Aqeedat

main kitni waraftagi se usay suna raha tha
wo saari baatein wo saare qisse
jo us se milne se paish-tar
meri zindagi ki hikayaten theen

main keh raha tha
k aur bhi log thay
jinhen meri aarzoo thi meri talab thi
k jin se meri mohabbaton ka raha talluq
k jin ki mujh per inayaten theen

main keh raha tha
k un mein kuch ko to maine
jaan se azeez jana
mager unhi mein se ba'az ko
meri be-dili se shikayaten theen
main eik eik baat
eik eik jurm ki kahani
dharakte dil kanpte badan se suna raha tha
mager wo pather bani
mujhe is tarah se sunti rahi
k jaise mere labon per
kisi muqaddas tareen saheefe ki aayaten theen


Ahmad Faraz