Daayre

ZakHm bhar jaate hain,
zahno se utar jaate hain,
din guzartaa hai, to
... phir shab bhi guzar jaati hai ..

phool jis shaakH se jhaD jaate hain,
mar jaate hain..

chand hi roz mein,
us shaakH pe aaindaa ke
phoolo.n ke nageene se ubhar aate hain ..

tere jaane se ,
meri zaat ke andar jo kHalaa goonjti hai..
ik na ik din use bhar jaanaa hai,
ik na ik roz tujhe
meri phaili hui,
tarsi hui, baaho.n mein palaT aanaa hai

Ahmad Nadeem Qaasimi