jaan-e-afasaanaa yahii kuchh bhii ho afasaane kaa naam

jaan-e-afasaanaa yahii kuchh bhii ho afasaane kaa naam 
zindagii hai dil kii dha.Dakan tez ho jaane kaa naam 

qataraa qataraa zindagii ke zahar kaa piinaa hai Gam 
aur Khushii hai do gha.Dii pii kar bahak jaane kaa naam

intizaar-e-fasl-e-gul me.n kho chuke aa.Nkho.n kaa nuur 
aur bahaar-e-baaG letii hii nahii.n aane kaa naam

taab-e-naakaamii nahii.n to aarazuu karataa hai kyaa 
aarazuu hai mauj ke saahil se Takaraane kaa naam

aaj tuu kal ko_ii aur hogaa sadar-e-bazm-e-may 
saaqiyaa tujh se nahii.n ham se hai maiKhaane kaa naam

vaaqif-e-"Mullaah" na thii bazm-e-Khirad, ye tay huaa 
ho na ho, ye hai kisii mashahuur diivaane kaa naam

Aanand Naaraayan "Mullaah"