mauj-e-gul, mauj-e-sabaa, mauj-e-sahar lagatii hai

sar se paa tak vo samaa.N hai ki nazar lagatii hai

hamane har gaam pe sajdo.n e jalaaye hai.n chiraaG
ab terii raahaguzar raahaguzar lagatii hai

lamhe lamhe mein basii hai terii yaado.n kii mahak
aaj kii raat to Khushbuu kaa safar lagatii hai

jal gayaa apanaa nasheman to koii baat nahii.n
dekhanaa ye hai ki ab aag kidhar lagatii hai

saarii duniyaa me.n Gariibo.n kaa lahuu bahataa hai
har zamii.n mujhako mere Khuun se tar lagatii hai

vaaqyaa shahar me.n kal to koii aisaa na huaa
ye to akhbaar ke daftar kii Khabar lagatii hai 

Jaa.n Nisaar Akhtar