Muhabbat hotay hotay ik nadamat ho gai akhir

Muhabbat hotay hotay ik nadamat ho gai akhir
Nadamat hotay hotay ik aziyat ho gai akhir

Ajab andaaz se tay marhalay dil k kiye humne
Jo dil ki naaz bardaari thi, nafrat ho gai akhir

Bhala maloom kya ho ga usay us ki judai mien
Hamen khud apne shikwoon se shikayat ho gai akhir

Kameenay ho gaye jazbay, hue badnaam khuaab apne
Kabhi is se, kabhi us se muhabat ho gai akhir

Sapehar e khaamshi hai, shaam hai, aur sehn e weerani
Wo shaam e fasl e sarsabzi hikayat ho gai akhir

Firaaq e wasl ka tha kya zamana kya kahoon akhir
Faqat ik aan thi, jo be nihayat ho gai akhir

Makaanon aur dukaanon pr ajab ik hadsa guzra
Zarurat ki hr ik shay be zarurat ho gai akhir

Chalay thay hum shumaal teera sabz e khuaab e khuaaban se
Hmari samt jabr e zard qismat ho gai aakhir

Na koi haal e dil tha, aur na koi haalat e jaan thi
Hamen us se usay hum se muhabat ho gai akhir

Sinaee aur Rumi ayse zehri thay k mat poocho
Kham e dil koocha pe daanish ki rehlat ho gai akhir

Miyaan jb haft shehr e ishq mien attaar ghoom aya
Az aan baad in pe barpa ik qayamat ho gai aakhir

Ghubaar e roshni mien boud ne kaati shab e hijrat
Shab e hijrat, dawaam e subh e hijrat ho gai akhir

Judaee, jo kabhi thi ik azaab e jawidaan e jaan
Gila ye hai, wohi dil ki saholat ho gai akhir

Na janay mehmil e laila ne kya dastoor apnaya
K dil ko qais k sehra se wehshat ho gai akhir

Nahi us ki farebai zara b zikr k qabil
K barham khud fareb e dil ki suhbat ho gai akhir

Manao jaan e jaan ab jashn tum apni faraghat ka
K hotay hotay haalat dil ki rukhsat ho gai akhir

Hai kya shauq e hamesha aur kya ishq e hamesha hai
K tha ik haal sa, phir aik haalat ho gai aakhir

Gumaan dil se gaye aur dil gaya apne gumaanon se
Daregha! Phir tu bs fursat hi fursat ho gai akhir

Wabayen phailti rehti thi dil basti mien pr yaaran
Phir is basti ko nagaahaan, shariyat ho gai akhi..!

Jaun Elia