Phir bhi hai tumko masihaai ka daavaa dekho

Phir bhi hai tumko masihaai ka daavaa dekho
Mujhko dekho, mere marne ki tamanna dekho

Jurm-e-nazaara pe kaun itni Khushaamad karta
Ab vo roothe hain lo aur tamaashaa dekho

Do hi din me vo baat hai na vo chaah na pyaar
Hum ne pehle hi ye tum se na kaha tha dekho

Hum na kehte the banaavat se hai saara Ghussa
Hans ke lo phir vo unhone hame dekhaa dekho

Masti-e-husn se apni bhi nahi tum ko Khabar
kya suno arz meri, haal mera kya dekho

Ghar se har vaqt nikal aate ho khole hue baal
Shaam dekho na meri jaan saveraa dekho

Khaanaa-e-jaan me namudaar hai ek paikar-e-noor
Hasarato aao rukh-e-yaar ka jalvaa dekho

Mar mite ham to kabhi yaad bhi tum ne na kiya
Ab muhabbat ka na karna kabhi daava dekho

Dosto tark-e-muhabbat ki nasihat hai fazuul
Aur na maano to dil-e-zaar ko samjha dekho

Sar kahi, baal kahi, haath kahi paanv kahi
Us ka sona bhi hai kis shaan ka sona dekho

Ab vo shokhi se ye kehte hain sitamagar jo hain hum
Dil kisi aur se kuch roz behlaa dekho

Havas-e-deed mitii hai na mitegii 'Hasrat'
Dekhne ke liye chaaho unhe jitna dekho 

Hasrat Mohaani