Sach ka zaher..

phuulo.n kii Tahaniyo.n pe nasheman banaayiye 
bijalii gire to jashn-e-charaaGaa.N manaayiye

kaliyo.n ke ang ang me.n miThaa saa dard hai 
biimaar nikahato.n ko zaraa gud_gudaayiye

kab se sulag rahii hai javaanii kii garm raat 
zulfe.n bikher kar mere pahaluu me.n aayiye

bahakii hu_ii siyaah ghaTaao.n ke saath saath 
jii chaahataa hai shaam-e-abad tak to jaayiye

sun kar jise havaas me.n ThanDak sii aa base 
aisii ko_ii udaas kahaanii sunaayiye

raste pe har qadam pe Kharaabaat hai.n "Adam" 
ye haal ho to kis tarah daaman bachaayiye 

Abdul Hameed "Adam"