Faarehaa

Saari batein bhool jana fareha
Tha who sab kuchh ik fasaana fareha

Haan mohabbat ek dhoka hi to thee
Ab kabhi dhoka na khaana fareha

Chherh de gar koi mera tazkera
Sunn ke tanzan muskuraana fareha

Meri jo nazmein tumhaare naam hain
Ab unhein mat gungunaana fareha

Tha faqat roohon ke naalon ki shikast
Woh tarannum, woh taraana fareha

Bahas kya karna bhala halaat se
Haarna hai, haar jaana fareha

Saaz o barg e aish ko meri tarah
Tum nazar se mat giraana fareha

Hai shaoor e gham ki ek qeemat magar
Tum yeh qeemat mat chukaana fareha

Zindagi hai fitratan kuchh bad-mizaaj
Zindagi ke naaz uthaana fareha

Peshkash mein phool kar lena qubool
Ab sitaare mat mangaana fareha

Chandd viraane tasawwur mein rahein
Jb nai duniya basaana fareha

Janib e ishrat gah e shehar e bahaar
Ho sake to mil ke jaana fareha

Sochta hoon kis qadar tareek hai
Ab mera baqi zamaana fareha

Sunn raha hoon manzil e ghurbat se door
Baj raha hai shadiyaana fareha

Maujazan pata hyoon main ik sail e rang
Az qafat ta aashiyaana fareha

Ho mubaarak rasm e taqreeb e shabaab
Bar-muraad e khusrawaana fareha

Saj ke woh kaisa laga hoga jo tha
Ek khwaab e shayeraana fareha

Sochta hoon mian, keh mujh ko chahiye
Yeh khushi dil se manaana fareha

Kya hua gar zindagi ki rah mein
Hum nahin shaana ba shaana fareha

Waqt shayad aap apna jabar hai
Us pe kya tohmat lagaaa fareha

Zindagi ik naqsh e by naqqaash hai
Us pe kya ungali uthaana fareha

Kaash ek qanoon hota jo nahin
Zakhm apne kya dikhaana fareha

Kaash kuchh iqdaar hotein jo nahin
Phir bhala dil kya jalaana fareha

Sirf ek jalti hui zulmat hai noor
Taab o tabish par na jaana fareha

Yeh jo sab kuchh hai yeh shayad kuchh nahin
Rog jee ko kya lagaana fareha

Sail hai, bas be-karaan lamhon ka sail
Gharq e sail e be-karaana fareha

  Jaun Elia