ibtidaa-e-ishq hai rotaa hai kyaa

ibtidaa-e-ishq hai rotaa hai kyaa
aage aage dekhiye hotaa hai kyaa

qaafile me.n subah ke ik shor hai
yaani Gaafil ham chale sotaa hai kyaa

sabz hotii hii nahii.n ye sar_zamii.n
tuKhm-e-Khvaahish dil me.n tuu botaa hai kyaa

ye nishaan-e-ishq hai.n jaate nahii.n
daaG chhaatii ke abas dhotaa hai kyaa

Gairat-e-yusuf hai ye vaqt-e-azeez
'Meer' is ko raayegaa.N khotaa hai kyaa

Meer Taqi Meer