Is dillagi mein haal jo dil kaa huaa, huaa

Is dillagi mein haal jo dil kaa huaa, huaa

kyaa poochte hain aap, tajaahul se kyaa huaa

is par bhi to nahi.n hai ghum e ishq mein kami,

khaataa hai ik jahaan tumhaaraa diyaa huaa

kyaa aise jaavidaa.n mein ghum e jaavidaa.n nahi.n,

insaan ko hai maut ka khaTkaa lagaa huaa

begaanaa thaa to koi shikaayat naa thi hume.n

aafat to ye hui ke wo mil kar judaa huaa

jisne kiyaa tapaak, usi ne kiyaa halaaq

jo aashnaa huaa,wahi naa'aashnaa huaa

dushnaam ko bhi aap se kisko ummeed thi,

humne to uspe sabr kiyaa jo ataa huaa

bekHud rahe visaal mein,behosh hijr mein

kyaa jaane humse kab wo milaa kab judaa huaa

aabaad kis qadar hai ilaahi adam ki raah

hardum musaafiro.n kaa hai taa.ntaa lagaa huaa

kis kis tarah se usko jalaate hain raat din,

wo jaante hain ''Daagh'' hai hum par miTaa huaa

Daagh Dahelvi