Le k aaya hooN tumhare saamney seeney k daagh

Le k aaya hooN tumhare saamney seeney k daagh
Deir se lou dey rahey haiN baada-e-funn k chiraagh
Aik rahro ja raha tha raastey meiN bey khayaal
Dil ko mustaqbil ki ummeedoN sey behlata huwa
Tum achanak aaeeN aur khaas ik doraahey k qareeb
Apni paayal k tarannum sey usey choNka dia
Aur us sey uski manzil ka tasawwur cheen kar
Aik bey maqsad safar k ehd o peimaaN kar liye
Ab tumhari Rahbaree thee aur takhayyul ka fareib
Raastey badley gaye aur kaarwaaN baRhney lagey
Zehn pey chaata raha rangeen khaaboN ka fusooN
Zindagi karney lagi khaaboN k gulzaaroN meiN raqs
Raat ki tanhaaiyoN meiN shehr-e-anjum k safar
KehkashaaN ta KehkashaaN na deeda sayyaroN meiN raqs
Mujh ko bakhshey thay unheeN nazaroN ney maekhaanoN k khaab
Aariz o Geisu sey wabasta shabistaanoN k khaab
Saahil-e-aghosh-e-sar masti meiN toofaanoN k khaab
Kiya magar khaaboN ka haasil,wo bhi deewaanoN k khaab?
Aur phir wo daur bhi aaya k tum ukta gayeeN
Apni hadd sey baRh gayee theeN,apni hadd meiN aa gayeeN
MaiN fareib-e-aarzu khaata raha,jeeta raha
Zehr-e-gham peeta raha,peeta raha,peeta raha
Chaak karti hi raheeN tum jeib o daamaan-e-wafa
Aur main sehta raha, sehta raha, sehta raha
Jaaney kyuN tum mustaqil daaman kushaaN rehne lageeN?
Bey sabab na mehrbaaN, na mehrbaaN rehne lageeN
Bhool kar ehd-e-nazar jaaney kahaN pohncha khayaal
ChoR kar shehr-e-wafa jaaney kahaN rehne lageeN?
Aah! Wo naaz-e-mohabbat ka yaqeen o aetbaar
MaiN ney tumko dam badam aawaaz par aawaaz di
Phir hudood-e-hasrat o ummeed tak dhoonda tumheiN
Rooh ki waadi meiN dil k saaz par aawaaz di
Loog kehte haiN yaqeenan theek hi kehte haiN loog
MaiN faqat wehmoN ki duniya meiN safar karta raha
MaiN ney chaahi bijlioN sey khirman andozi ki daad
Path’tharoN sey khaahish-e-lutf-e-nazar karta raha
Kiya tumhare shehr meiN ley kar duaaoN k hisaar
Noujawaani ko mitaaney k liye aaya tha maiN?
Kia shaoor-e-zindagi ki daad paaney k bajaaye
MaekadoN meiN laR khaRaaney k liye aaya tha maiN?
Ab shaoor-e-zindagi ko aazmaaney do mujhey
Kuch hijaabaat-e-mizaaj-e-dil uthaaney do mujhey
Aik hi rukh tumney dekha hai abhi tasveer ka
Aaj us ka doosra rukh bhi dikhaney do mujhey
Tum ko apnaya tha,tumko choR bhi sakta hooN maiN
BuTT banata hi nahiN hooN,ToR bhi sakta hooN main .......


Jaun Eliaa