dil khoon hai, har aankh hai nam, dekh rahe ho.

dil khoon hai, har aankh hai nam, dekh rahe ho.
is daur ka dastoor-e-karam, dekh rahe ho.

akhbaar me milti hai, sadaa khoon ki surkhi.
auraaq-e-siyaaposh ka gham, dekh rahe ho.

bebas hai meri zaat to, majboor mehez tum.
aazaad gulaamo.N ke sitam, dekh rahe ho.

Insaan ke bachne ki koi raah nahi hai.
har modd par ye dair-o-haram dekh rahe ho.

Khud apne liye, faisalaa-e-maut likha hai.
tooti hui ye nok-e-qalam dekh rahe ho.

dekha hai "hayaat" humne unhein maut ke moonh me.
tum jinko kitaabo.N me raqam, dekh rahe ho

Hayaat Haashmi