main fanaa hoon, teri hasti ko baqaa hai ke nahi.

main fanaa hoon, teri hasti ko baqaa hai ke nahi.
meri hasti, teri hasti se judaa hai ke nahi.

Bakhsh di toor pe moosa ko mai hoshrubaa.
mere saaqi mere hisse ki bataa hai ke nahi.

waaqayaa-e-daar-o-rasan, saaneeha-e-karb-o-balaa.
aur ye sab teri marzi se hua hai ke nahi.

teri soorat ko jo dekha to samajh me aaya.
warna me soch raha tha ke khuda hai ke nahi.

shor karte ho, gulistaa.N me bahaar aayi hai.
ye to dekho koi guncha bhi khilaa hai ke nahi.

tu mujhe bhool gaya hai, magar ae jaan-e-"hayaat"
har nafas maine tujhe yaad kiya hai ke nahi.

Hayaat Haashmi