Tumhaari anjuman se uthke deewaane kahaa.n jaate,

Tumhaari anjuman se uthke deewaane kahaa.n jaate,
jo waabastaa hue tumse wo afsaane kahaa.n jaate


nikal kar dair o kaabaa se agar miltaa naa maiKhaana,
to thukraaye hue insaa.n Khudaa jaane kahaa.n jaate


tumhaari berukHi ne laaj rakh li baadaakHaane ki,
tum aankho.n se pilaa dete to paimaane kahaa.n jaate


chalo achchaa huaa kaam aa gayi diwaangi apni,
wagarnaa hum zamaane bhar ko samjhaane kahaa.n jaate


''Qateel'' apnaa muqaddar ghum se begaanaa agar hotaa
to phir apne paraaye humse pahchaane kahaa.n jaate


Qateel Shifaai