aankhon mein raha dil mein utar kar nahi dekha

aankhon mein raha dil mein utar kar nahi dekha
kashti k musafir ne samandar nahi dekha

be-waqt agar jaon ga sab chonk paren ge
eik umar hui din mein kabhi gher nahi dekha

jis din se chala hoon meri manzil pe nazar hai
aankhon ne kabhi maail ka pathar nahi dekha

ye phool mujhe koi wirasat mein mile hain
tumne mera kanton bhara bistar nahi dekha

yaaron ki mohabbat ka yaqeen kar liya maine
phoolon mein chupaya hua khanjar nahi dekha

mehboob ka gher ho k buzurgon ki zameenen
jo chorr diya, usay murr kar nahi dekha

khat aisa likha hai k nageene se jurre hain
un haathon ne lekin koi zewar nahi dekha

pathar mujhe kehta hai mera chahne wala
main moom hoon us ne mujhe choo kar nahi dekha

wo mera masa'il ko samajh hi nahi sakta
jis ne meri aankhon mein samandar nahi dekha

Basheer Badr