Barson k baad dekha aik "shakhs dilruba sa"

Barson k baad dekha aik "shakhs dilruba sa"
ab zehan mein nahi hai par naam tha bhala sa

Abro khinche khinche se aankhen jhuki jhuki si
baatein ruki ruki si lehja thaka thaka sa
...
Alfaz thay k jugnu aawaz k safar mein
ban jaye jungalon mein jis tarah raasta sa

Khuwabon mein khuwab us k yaadon mein yaad us ki
neendon mein ghul gaya ho jesay k ratjagga sa

Pehle bhi log aaye kitne hi zindagi mein
wo her tarah se lekin auron se tha juda sa

Agli mohabbaton ne wo na-muradiyan den!
Taza rafaqaton se dil tha dara dara sa

Kuch ye k muddaton se hum bhi nahi thay roye
kuch zehar mein bujha tha ehbaab ka dilasa

Phir yun hua k sawan aankhon mein aa base thay
phir yun hua k jese dil bhi tha aabla sa

Ab such kahen to yaaro hum ko khabar nahi thi
ban jaye ga qayamat ek waqiya zara sa

Tewar thay berukhi k andaz dosti k
wo ajnabi tha lekin lagta aashna sa

Hum dasht thay k darya, hum zehar thay k amrat
na-haq tha za'am hum ko jab wo nahi tha piyaasa

Hum na bhi us ko dekha kal shaam ittefaqan
apna bhi haal hai ab logo Faraz ka sa

Ahmad Faraaz