gham raha jab tak ke dam men dam raha,

dil ke jaane ka nihaayat gam raha,

husn tha tera bahut aalamfareb,

khat ke aane par bhi ik aalam raha,

dil na pahuncha gosha-e-daaman talak,

qatra-e-khoon tha, mizaa par jam raha,

sunte hain lailaa ke kheme ko siyaah,

ismen majnoon ka magar maatam raha,

jaama-e-ehraam-e-zaahid par na jaa,

tha haram men lek, na mehram raha,

zulfen kholi to, tu tuk aaya nazar,

umr bhar yaan kaam-e-dil barham raha,

uske lab se talkh hum sunte rahe,

apne haq men aab-e-haiwaan sam raha,

mere rone ki haqeeqat jismen thi,

ek muddat tak vo kaagaz nam raha,

subah peeri, shaam hone aayi "meer"

tu na cheeta yaan bahut din kam raha,

Meer

Shayari Ke Phool