Jalwaa ye rangee.n utar aayaa nigaah e shauq mein

Jalwaa ye rangee.n utar aayaa nigaah e shauq mein
hum lataafat jism ki aye seem tan dekhaa kiye

shewaa ye mansoor thaa ahl e nazar par bhi giraa.n
phir bhi kis hasrat se sab daar o rasun dekhaa kiye

dasht e ghurbat ki taraf ik aah bhar kar just ki
gard ko pahro.n meri ahl e watan dekhaa kiye

bulbul o gul mein jo guzri, hum ko is se kyaa ghurez
hum to gulshan mein faqat rang e chaman dekhaa kiye

dauDte phirte the jalwe un ke mauj e noor mein
door se hum raaz e sham'e anjuman dekhaa kiye

Asghar GonDvi