Jamaal Ab To Yehi Reh Gaya Pata Us Ka

Jamaal Ab To Yehi Reh Gaya Pata Us Ka
Bhali Si Shakl Thi Acha Sa Naam Tha Us Ka

Phir Aik Saya Dar o Baam Par Utar Aya
Dil o Nigaah Main Phir Zikr Chirr Gaya Us Ka

Kisey Khaber Thi Ke Yeh Din Bhi Dekhna Hoga
Ab Aitebaar Bhi Dil Ko Nahi Raha Us Ka

Jo Mere Zikr Par Ab Qahqahey Lagata Hai
Bicharte Waqt Koi Haal Daikhta Us Ka

Mujhe Tabaah Kia Aur Sab Ki Nazroon Main
Wo Be-Qasoor Raha , Ye Kamaal Tha Us Ka

Jo Saya Saya Shab o Roz Mere Saath Raha
Gali Gali Main Pata Pochta Raha Us Ka

Jamaal Us Ne To Thani Thi Umr Bhar Ke Liye
Yeh Chaar Roz Main Kia Haal Ho Gaya Us Ka

Jamaal Ehsani