Jungal jungal ek parindaa ro legaa

Jungal jungal ek parindaa ro legaa
basti mein aane ko par nahi.n kholegaa

raste kaa kuttaa hai samay ki mat poocho
koi sawaari dekh ke peeche ho legaa

dil pe daagh lage hain us kaa kyaa hogaa
maarne waalaa haath to apne dho legaa

Ik din koi chaabi lekar aayegaa
jaadu kaa sandkooq kabhi to kholegaa

baawan saal se dharnaa de kar baiThaa hoon
kabhi to mere andar waalaa bolegaa

Mohammad Alvi