Junoon e shauq ab bhi kum nahin hai

Junoon e shauq ab bhi kum nahin hai
magar wo aaj bhi barhum nahin hai

bahut mushkil hai duniyaa kaa sa.nwarnaa
teri zulfo.n kaa pecho kHum nahin hai

bahut kuch aur bhi hai is jahaa.n mein
ye duniyaa mahez ghum hi ghum nahin hai

taqaaze kyun karoo.n paihum naa saaqi
kise yaa.n fikr e besh o kum nahin hai

idhar mashkook hai meri sadaaqat
udhar bhi badgumaani kum nahin hai

meri barbaadiyo.n kaa hum nasheeno
tumhe kyaa jab* mujhe bhi ghum nahin hai

abhi bazm e tarab se kyaa utHoo.n main
abhi to aankh bhi purnam nahin hai

be ayn sail e ghum o sail e hawaadis
meraa sar hai ke ab bhi khum nahin hai

''Majaaz'' ik baadaah kash to hai yaqeenan
jo hum sunte the wo aalam nahin hai

Majaaz