Phirtaa hai zindagi ke liye aah kHwaar kyaa

is wahan ki namud ka hai ait'baar kyaa

Kyaa jaane.n hum aseere qafaszaadaa aye naseem,

gul kaise, baagh kahte hain kis ko bahaar kyaa

aankhe.n ba rang e naqsh e qadam ho gayi.n safed,

phir aur koi us ka kare intizaar kyaa

nai wo nigaah chubhi hai na we palke.n gaD gayi.n

kyaa jaaniye ke dil ko hai ye kHaar kHaar kyaa

maaraa ho ek do ko to ho mud'dai koi

kushto.n ka us ke roz e jazaa mein shumaar kyaa

paate hain apne haal mein majboor sab ko hum,

kahne ko ikHtiyaar hai par ikHtiyaar kyaa

aakHir zamaanaa saazi se khoyaa na waqr ''meer''

ye ikHtiyaar tune kiyaa rozgaar kaa

Meer Taqi Meer

Shayari Ke Phool