Dukaan e Giriyaa

Poochne wale
tujhe kese batayen aakhir
dukh ibarat to nahi jo tujhe likh kar bhejen
ye kahani bhi nahi hai k sunayen tujh ko
na koi bat hi aisi k batayen tujh ko
zakham ho to tere nakhun k hawale kar den
aaina bhi to nahi hai k dikhayen tujh ko
tu ne pocha hai magar kese batayen tujh ko
ye koi raz nahi, jis ko chupayen to wo raz
kabhi chehre kabhi ankhon se chalak jata hai
jese aanchal ko sanbhale koi, aur taiz hawa
jab bhi chalti hai to shaanon se dhalak jata hai
ab tujhe kese batayen k humen dukh kya hai
jism mein rengti rehti hai musafat ki thakan
phir bhi kaandhon pe uthaye hue haalat ka bojh
apne qadmon se hatate hue saaya apna
jis ko bhi dekhiye chup chap chala jata hai
kabhi khud se kabhi raston se ulhajta hai magar
jane wala kisi aawaz pe rukta hi nahi
dhondna hai naya pairaya e izhaar humen
isti'aron ki zaban koi samajhta hi nahi
dil girafta hain tilismat e ghum e hasti se
sans lene se fason kari e jaan totti hai
ek taghayyur pass e har shay hai magar zulm ki dor
abhi malom nahi hai k kahan totti hai
tu samajhta hai k khushbu se mo'attar hai hayat
tu ne chakkha hi nahi zehar kisi mausum ka
tujh pe guzra hi nahi raqs e junon ka aalam
aisa aalam jahan sadiyon k tahayyar ka nasha
her bicharti hui sa'at se gale milta hai
is tamashe ka bazahir to nahi koi sabab
sirf mehsos karoge to pata chalta hai
ek dhun hai jo sunai nahi deti phir bhi
la'y ba la'y barhta chala jata hai hangam e sitam
ku ba ku phelta jata hai ghubar e man o tu
roh se khali hue jate hain jismon k haram
waqt be reham hai,hum raqs barhina hain sabhi
ab to paband e salal nahi koi phir bhi
dasht e mazgaan mein bhatakta hua taaron ka hujoom
safha e lab pe sisakti hui aawaz ki law
dekh to kese rihai ki khabar karti hai
rozan e waqt se aaghaz e safar karti hai
be khabar rehna kisi bat se acha hi nahi
tu kabhi waqt ki dehlez pe thehra hi nahi
tu ne dekhe hi nahi halqa e amroz k rang
garmi e wadaa e farda se pighalte hue log
bhok or piyas ki maari hui faslon ki tarah
barre aazam ki lakkeron se ubharte hue log
aman k naam pe barood bhari dunya mein
khass o khashak ki manind bikharte hue log
roz jete hue or roz hi marte hue log
zindagi film nahi hai k dikhayen tujh ko
tu ne pocha hai magar kese batayen tujh ko
koi mehfoz nahi ehl e tahaffuz se yahan
rat bhari hai kahin or kahin din bhari hai
sari dunya koi maidan sa lagti hai humen
jis mein ek maarka e sod o ziyan jari hai
paon rakhe hue barood pe sab jahan
apne hathon mein uthaye hue parwana e shab
aasteenon mein chupaye hue mahtaab koi
apni gardan mein leye apne gareban ka tauq
neend mein chalte hue dekhte hain khuwab koi
or ye sochte rehte hain k dewaron se
shab k aasar dhale,subha ka chehra ubhra
dor ufaq paar paharon pe chamakti hui baraf
naye suraj ki tamazat se pighal jayegi
or kisi waqfa e imkan e sehar me ab k
roshni sare andheron ki nigal jayegi
dekhiye kese pohanchti hy tikhane pe kahin
dor ek faakhta urti hy nishane pe kahin
aa k ye manzar e khon basta dikhayen tujhko
tu ne pocha hy magar kese batayen tujhko
koi gahag hi nahi johar e ainda ka
chashm khole hue bethi hy dukan e girya
or isi manzar e khon basta k goshe me kahin
sar pe dale hue ek lamha e maujod ki dhol
tere ushhaaq bohat khak basar phirte hen
waqt kab khench le maqtal me gawahi k lye
dast e khali me lye kasa e sar phirte hen
dukh ibarat to nahi jo tujhe likh kar bhejen
dukh to mehsos hua karta hy
chahe tera ho k mera dukh ho
admi wo hy jise jete ji
sirf apna nahi sab ka dukh ho
chak hojaye jo ek bar hawas k hathon
jama e ishq dobara to nahi silta hy
asman meri zamenon pe jhuka hy lekin
tera or mera sitara hi nahi mita hy....

Saleem Kauser