Kahin tum apni qismat ka likha tabdeel kar lete

Kahin tum apni qismat ka likha tabdeel kar lete
to shayad hum bhi apna raasta tabdeel kar lete

Agar hum waqai kam hausla hote mohabbat mein
marz barhne se pehle hi dawa tabdeel kar lete

Tumhare sath chalne pe jo dil razi nahi hota
bohat pehle hum apna faisla tabdeel kar lete

Tumhen in mausamon ki kya khabar milti, agar hum bhi
ghutan k khauf se aab o hawa tabdeel kar lete

Tumhari tarah jene ka hunar ata to phir shayad
makaan apna wohi rakhte pata tabdeel kar lete

Wohi kirdaar hain tazah kahani mein jo pehle bhi
kabhi chehrah kabhi apni qubaa tabdeel kar lete

Judai bhi na hoti, zindagi bhi sehal hojati
jo hum ek dosre se mas'ala tabdeel kar lete

Hamesha ki tarah is bar bhi hum bol uthe warna
gawahi dene wale waqiya tabdeel kar lete

Bohat dhundla gaya yaadon ki rimjhim mein dil e saadah
wo mil jata to hum ye aaina tabdeel kar lete

 Saleem Kauser