aaj malboos mein hai kaisi thakan ki kHushboo

aaj malboos mein hai kaisi thakan ki kHushboo
raat bhar jaagi hui jaise dulhan ki kHushboo

pairhan meraa magar uske badan ki kHushboo
uski tarteeb hai ik ek shikan ki kHushboo

mauja-e gul ko abhi azn e takammul na mile
paas aati hai kisi narm sukHan ki kHushboo

qaamat e sher ki zebaayi kaa aalam mat pooch
mehrbaa.n jab se hai us sar o badan ki kHushboo

zikr shaayad kisi kHursheed badan kaa bhi kare
koo ba koo phaili hui mere gahan ki kHushboo

aariz e gul ko chhuaa thaa ke dhanak si bikhri
kis qadar shokH hai nanhi si kiran ki kHushboo

kisne zanjeer kiyaa hai ram e aahoo chashmaa.n
nikhat e jaa.n hai unhi.n dasht o daman ki kHushboo

is aseeri mein bhi har saa.ns ke saath aati hai
sahn e zindaa mein unhe dasht e watan ki kHushboo

Parveen Shaakir