Aaj kal qismat ki hum per meharbani aur hai

Aaj kal qismat ki hum per meharbani aur hai
wo kahani aur thi aur ye kahani aur hai

Her sitam k bad hans kar mujh se kehta hai naseeb
be khabar! tere leye ek nagahani aur hai

Tere mere dard ka hai zaiqa bilkul alag
karb e hijrat aur hai naql e makani aur hai

Aankh aur aanso ka ye bandhan hai bachpan se magar
ab k sawan rut mein ashkon ki rawani aur hai

Ye haqeeqat hai, guman hai ya tasawwur ya khayal
zindagi k bad her ek zindagani aur hai

Daman e sad chaak tha pehchan pichle daur mein
ishq k maaron ki lekin ab nishani aur hai

Sochta hai kya mujhe wo bhi bhari barsat mein?
hai haqeeqat aur, lekin khush gumani aur hai

HUMAIRA RAHAT