achanak hi achanak sab aada'ein beet jati hain

achanak hi achanak sab aada'ein beet jati hain
mohabbat beet jati hai wafaein beet jati hain

agarche aankh se dil tak bohat barsat rehti hai
magar eik din ye sab ki sab ghata'ein beet jati hain

udaasi ki lakeeron k siwa kuch bhi nahi rehta
samandar chorr jata hai, hawa'ein beet jati hain

ajab dhoka sa eik kuch bhi samajh anay nahi deta
zamanay laut jatay hain, sada'ein beet jati hain

musibat k dinon mein khaas kar maine ye dekha hai
meray jaison k hissay ki dua'ein beet jati hain

Farhat Shah