Bohat din reh leye naraz ab man jayen hum donon

Bohat din reh leye naraz ab man jayen hum donon
chalo ek bar phir se aashna ban jayen hum donon

Yahan walon ki aankhon mein haya ho ya murawwat ho
to aakhir kyon ye basti chorr k bann jayen hum donon

Kisi hotel mein chal kar sochte hain shaam ki babat
guzaaren waqt sahil per k gulshan jayen hum donon

Yahan hona nahi kafi yahan ban'na hi parta hai
chalo ek dosre k kuch na kuch ban jayen hum donon

Yaheen kuch door waaqe hai humare piyare ka madfan
agar dai zindagi fursat to madfan jayen hum donon

Shaur is bheerr mein rasta milay to bheerr se bahar
ajab sa ek nasheman hai, nasheman jayen hum donon



Anwar Sha'oor