Chalo ab faislaa kar le.n

chalo ab faisla kar lain!
k is raste pe kitni door jana hai?
mujhe tumse bicharna hai?
tumhen mujh ko bhulana hai?
bohat din tak
kabhi saahil ki bheegi rait per yunhi
tumhara naam likha hai
kabhi khushbu pe ashkon se
koi paigham likha hai
kabhi tanhai ki wehshat mein
dewaron se baaten keen
kabhi chhat per tehal kar
chaand se, taaron se baaten keen
magar ye ishq ki dewangi thehri
koi hasil nahi jis se
nadi k do kinaron ki tarah
hamrah chalne se
alag taaqon mein rakhe
do chiraghon ki tarah ek sath jalne se
bhala kiya faida hoga
ye ek aesi mohabbat hai
k jis mein qurbat o furqat ka
ya sod o ziyan ka
koi bhi lamha nahi ata
so is be rabt qisse ka
koi anjaam hojaye
chalo ab faisla kar lain


Humairaa Raahat