chalo awaz de kar dekhte hain

chalo awaz de kar dekhte hain
mausumon ko, sa'aton ko, qurbaton ko
aur un logon ko
jo rah e wafa mein kho gaye
lekin humari yad k
tanha ufaq per
chaand ban kar
aaj bhi wo jagmagate hain
chalo awaz de kar dekhte hain
un tamannaon ko
jo aesa samandar ban gayin
qismat mein jis k piyas likhi hai
aur jin k karb se
murjhaye chehre,roi ankhen
be sada awaz sun kar
reham ata hai
ye socha hai
hum un ko hasraten keh kar
pukaren ge
chalo awaz de kar dekhte hain
un duaon ko
jo ab tak ek hurf e 'KUN' ki chahat mein
najane kab se
neele aasman ki
rafaton mein
rah takti hain
ek aese pal ka
jo un ki talab ka isam ban jaye
wagarna!
wagarna, naarsai to muqaddar hai
chalo awaz de kar dekhte hain
magar awaz kis ko den?
Yahan to bolne per
baat karne per bhi pehre hain
yahan sab log behre hain


Humairaa Raahat