Ho gaye sunsan raste khauf se

Ho gaye sunsan raste khauf se
urr gaye sare parinde khauf se

Jane ab munsif kare kia faisla
parr gaye hain zard chehre khauf se

Zinda insaanon ki halat dekh kar
gir gaye do chaar kutbe khauf se

Kis k gher thehre gi ye tareek raat
band hain sare dareeche khauf se

Orrh hi lenge samandar ek din
chahaton k sab jazeere khauf se

Ek ajab sa darr hai lafzon per muheet
hogaye hain hurf gonge khauf se

Aadmi ne karname wo keye
chhup gaye wehshi darinde khauf se

Darmiyan apne thi andeshon ki baarrh
mar gaye sab khuwaab mere khauf se

Humaira Rahat