Ab mujh ko rukhsat hona hai, kuch mera haar singhaar karo

Ab mujh ko rukhsat hona hai, kuch mera haar singhaar karo
kiyon dair lagati ho sakhiyon, jaldi se mujhe tayyar karo

Ye kesa anokha jorra hai jo aaj mujhe pehnaya hai
main hooron jesi dulhan bani, ab ut'tho aur deedar karo

Ek haar hai surkh gulaabon ka, ek chadar surkh gulaabon ki
aur kitna roop charrha mujh per, is baat ka tum iqraar karo

Ek baar yahan se jaongi, main laut k phir kab aaongi
tum aah o zaari laakh karo, tum minnat saw saw baar karo

Roo roo kar aankhen laal huin, tum kiyon sakhiyon be haal huin
ab doli uthne wali hai, lo aao mujh ko piyaar karo

Haan yaad aaya is basti mein kuch diye jalaye thay maine
tum un ko bujhne mat dena, bas ye waada ek baar karo

Shabnam Shakeel