aaj mujh ko bhi koi kaam nahi

aaj mujh ko bhi koi kaam nahi
aur ye nazm bhi adhoori hai
zehn o dil phir yahii.n lagaate hain...!

zindagi ki kitaab ka har baab
ik dafa phir se dekh lete hain
kaun se warq per hai kya tehreer
kaun se lafz ke hain kya maaini
sab naye zaaviye se dekhte han...!

gair mumkin nahin, kahi mujh ko
thodi se khaali jag'eh mil jaaye
jis pe mera qalam bhi chal jaaye
kuch naye lafz raqm ho jayein
kuch puraano ke naqsh mit jaayein...!

phir ye mumkin hai , maayini zindagi ke
aur hi mafhoom me nikal aayein...!

bekhayaali ka hai khayaal magar
hone ko kya nahi ho sakta hai...!! 

Noor Uz Zaman