Ajeeb rang tere husn ka lagaaw mein thaa

Ajeeb rang tere husn ka lagaaw mein thaa
gulaab jaise kaDi dhoop ke alaaw mein thaa

hai jiski yaad mire fard e jurm kii surKhi
usi ka aks mere ek ek ghaaw mein thaa

yahaan wahaan se kinaare mujhe bulaate rahe
magar main waqt ka daryaa thaa aur bahaaw mein thaa

uroos e gul ko sabaa jaise gudgudaa ke chali
kuch aisa pyaar kaa aalam tere swabhaaw mein thaa

main pur sukooN hoon magar meraa dil hii jaanta hai
jo intishaar mohabbat ke rakh-rakhaaw mein thaa

ghazal ke roop mein tahzeeb gaa rahi thii "Nadeem"
miraa kamaal mire fan ke is rachaaw mein thaa

Ahmad Nadeem Qasmi