guzre jo apne yaaroN kii sohbat mein chaar din

guzre jo apne yaaroN kii sohbat mein chaar din
aisaa lagaa basar hue jannat mein chaar din

umr e kHizar kii usko tamanna kabhi naa ho
insaan jii sake jo mohabbat mein chaar din

jab tak jiye nibhaayenge hum un se dosti
apne rahe jo dost museebat mein chaar din

aye jaan e aarzoo wo qayaamat se kam naa the
kaaTe tire baGhair jo Ghurbat mein chaar din

phir umr bhar kabhi na sukooN paa sake aye dil
kaTne the jo bhi kaT gaye raahat mein chaar din

jo faqr mein suroor hai shaahi mein wo kahaaN
ham bhi rahe hain nashshaa-e-daulat mein chaar din

us aag ne jalaa ke ye dil raakh kar diyaa
uthte the josh shole jo wahshat mein chaar din

A G Josh