shikast e zaat kii ye aakhiri nishaani thi

shikast e zaat kii ye aakhiri nishaani thi
mire wajood se sairaab raai'gaani thi

mujhe charagh banaana tha apni mitti se
badan jalaa ke tumhe raushni dikhaani thi

pakaD raha tha main aankhoN se jugnuoN ke badan
andheri raat thi,mash-al mujhe banaani thi

utar raha tha falak matti ke katore mein
zameen simatti hui khud mein paani paani thi

ghazal utarne se pahle hi so gaya tha main
mire tavaaf mein misroN kii raai'gaani thi

palak jhapakne ke is khel mein khabar kya thi
mujhe nazar kisi tasveer se milaani thi

Noor Uz Zaman

Shayari Ke Phool