kise khabar hai ke umr bas us pe ghaur karne mein kaT rahi hai

ke ye udaasi humaare jismon se kis khushi mein lipaT rahi hai

ajeeb dukh hai hum us ke hokar bhi usko chhoone se Dar rahe hain,

ajeeb dukh hai humare hisse kii aag auron mein baT rahi hai

main usko har roz bas yahi ek jhooth sunne ko phone karta,

suno, yahaan koi mas'ala hai tumhaari aawaaz kaT rahi hai

mujh aise peDon ke sookhne aur sabz hone se kya kisi ko

ye bel shaayad kisi museebat mein hai jo mujhse lipaT rahi hai

ye waqt aane pe apni aulaad apne ajdaad bech degi

jo fauj dushman ko apna saalaar girvi rakhkar palaT rahi hai

so is ta'alluq mein jo ghalat-fahmiyaan thin ab door ho rahi hain,

ruki hui gaaDiyon ke chalne ka waqt hai dhundh chhaT rahi hai

Tehzeeb Hafi

Shayari Ke Phool